Laingantu: Henry T. Conzo
Date: 25 December 2024

Bible siar: Luka 2:1–7

1 Cia can ah Kumpimangbawi Augustus um ai a ukhnak Rome ram song hmuahhmuah ah mipum siar ai hming lang tuh sio in thupe i. 2 Hemi mipum siarhnak hmasaber can ah Quirinius tu Syria ram uktu i. 3 Ciamanin aisusu khai mipum siar ai hmingkhum tuhin amahte ai suakhnak khua ṭen ah feh tlang i.

4 Joseph tu Galilee ram Nazareth khua in Kumpibawi David tehnak Judea ram Bethlehem khua ah feh i. Joseph tu David ai tesinfa imanin cia khua ah a fehhnak i. 5 Mipum siar hmingkhum tuhin hoi tuh thawlthan ai a ham cia Mary thawn feh kawm i. Mary tu naupai ai,

6 Bethlehem khua ah a um laitak ah nau nai can khim i. 7 A fa upa ber ah fapa in nai ai pon in tuam hnuaah kawlpaw kuang songah hlim i; zaimantifangin riahbuk ah akhan co lo i.

Thuhmai hoi

Jesuh tehnak thu – Christmas thu – heh Khrihfate in thupui ngai in le songlawi ngai in hmang tlang de i sing. Cen, Bible songah Jesuh suahkehhnak thu heh ngankhum khalselai, suahnia, suahhla, le suahkum heh fiangin nganhnak umlo i. Ciamanin, Christmas – Jesuh tehnak thu – heh ngaihsunurkul pakhat i. Laivum dan ai nia-songlawi le nia-thupuite heh hnikhnaih ben, ling ben de i. Cen, laivum minungte lakah mi-hmingthang, mi-lar, mi-thupuite suahnia (or) hnikhnaihtlak thil thupui a bawnhnakte le a niate khai heh thuanthu ah ngankhum in ling thil hlen i. Santehhnak: Herod lian in Ceasarea khuapui heh 25 – 13 B.C., ah sa i tiin, ling ben i.[1] Khrihfa san thuanthu, a hlaicein, A.D., 300, hlan, kilkhawltu ber Eusebius, le Judah sakhua biakhnak thuanthu ngantu hmingthang, Flavius Josephus te suah kum heh ling ben i.[2] Cen, Jesuh te camcu dungai Rome kumpimangbawi a pertu Caesar (Kaisar) Augustas suah cam heh September 23, 63 B.C., ah tiin, a nia rori khai ling ben tlang i.[3] Ikhalselai, kin Bawipa Jesuh suah kum tu ling fiang benlo i. Ciaheh Chritmas – Jesuh tehnak thu – ngaihsunurkul phunkhat, tiin ruat thilhnak i.

Pathian thuthangpha phuangtu tampui in Jesuh suahhnak thu heh kumsiar ruahdan tumce, hmudan tumce, hlirdan tumce, reldan tumce, sullam tumce ten in reltlang phuangtlang de ai, a zatu le thuthangpha a ngaitute in khai heh ruahhnak thar le linghnak thar ngahin thazang thar langtlang tio de i sing. Tunkum Christimas 2024 thu, ruat tlang tuhin thupui kin dan nuamhnak tu: Jesuh Khrih suahkehhnak thu ah, ram uktu bawite thu phatak in hlunhnak thu, nuphun dan khai phatan in hlunhnak thu, le Biahnak Dan khai phatak neu hlunhnak thute ruat tlang tuh i sing. Chrisrmas 2024 Sermon thulu tu, “Tangdorhnak thawn Dan semkhim ruaitu Jesuh tehnak” tihnak thu ruat tlang tuh i sing.

Luka 2:1-7 siar ilesingkhaw Jesuh suahkehhnak thu i. Joseph le Mary heh tangdor ngai in amahte nunphung (Mosi Dan) hlun in rinsuharsa le mualpho tuar in fapa Jesuh Khrih heh te i. Joseph le Mary te tangdorhnak thinlung a naihnak heh phunhnih in khan thil i. Pakhat (1) hnak ah Cozah uktute thu ngai i. Pahnih (2) hnak ah, Mosi Dan (Hebru nunphung) hlun i. Ciami thute heh ruat tlang vivo nga sing.

I. Cozah uktu thu hlun (vv. 1-3).
II. Mosi Dan (or) Hebru nunphung dan hlun (vv. 4-7)

• A) Profet ponghnak khim ruai in Bethlehem ah feh (4-5)
• B) Hotel ah zancam hmun ngahlo heh Mosi Dan khimruaihnak i (vv. 6-7)

I) Cozah uktu dan hlun i – Rom kumpibawi tuh suah mipum siar

2:𝟏-𝟑 𝐋𝐚𝐢𝐯𝐮𝐦 𝐮𝐤𝐭𝐮𝐭𝐞 𝐢𝐧 𝐚𝐦𝐚𝐡𝐭𝐞 𝐮𝐤𝐡𝐧𝐚𝐤 𝐫𝐚𝐦 𝐬𝐨𝐧𝐠𝐚𝐡 𝐦𝐢𝐩𝐮𝐦 𝐬𝐢𝐚𝐫 𝐭𝐮𝐡 𝐢𝐧 𝐭𝐚𝐰𝐥𝐫𝐞𝐥 𝐢: Cia can ah Kumpimangbawi Augustus um ai a ukhnak Rome ram song hmuahhmuah ah mipum siar ai hming lang tuh sio in thupe i. Hemi mipum siarhnak hmasaber can ah Quirinius tu Syria ram uktu i. Ciamanin aisusu khai mipum siar ai hmingkhum tuhin amahte ai suakhnak khua ṭen ah feh tlang i.

i) Rome Cozah ukhnak ramsongah mipum siarhnak heh velli um awng ai, zaikom dungah siar tihnak rel fianglo i.[4] Ikhalselai Saya Hre Kio in tu, velthum siar awng tiin ngan ai, 28 B.C., 8 B. C., le AD 14 ah Rome cozah in mipum siar awng ti i.[5] Rome cozah in mipum siar dehnak sullam phunhnih um i:

1) Siah khon tuhhnak le
2) ralkap per tuhhnak hrang ah

Joseph le Mary in cozah thusuah mipum siar tuh manin Joseph suahkehhnak Bethlehem khua ah feh i. Rome cozah ukhnak ram songai umtute heh amahte suahkehhnak kua tenah fel tlang i (2:3). Joseph heh nupui tuhin a zawtdunzohnak Mary thawn Cozah thusuak hlun in a pu David teehnak Bethlehem khua ah feh i (2:4). Ciatihin a feh hmunah Mary in fapa Jesuh Khrih tee i.

• Cozah uktu bawite thu ngai tuih. Thilpha bawn tute in uktu bawite lau tuhhnak ilo i (Rome 13:1-5).
• Muang neu le rem neu in ning umtlang thil tuh in, ning konghoitute thu ngai tuih (Hebru 13:17).

II). Mosi Dan (or) Hebru nunphung dan hlun (vv. 4-7)

A) Prophet ponka khim ruaihnak manin Bethlehem ah feh

𝐯𝐯. 𝟒-𝟓 𝐉𝐨𝐬𝐞𝐩𝐡 𝐭𝐮 𝐃𝐚𝐯𝐢𝐝 𝐭𝐞𝐬𝐢𝐧𝐟𝐚 𝐦𝐚𝐧𝐢𝐧 𝐃𝐚𝐯𝐢𝐝 𝐭𝐞𝐚𝐰𝐧𝐠𝐡𝐧𝐚𝐤 𝐁𝐞𝐭𝐡𝐥𝐞𝐡𝐞𝐦 𝐤𝐡𝐮𝐚 𝐚𝐡 𝐦𝐢𝐩𝐮𝐦 𝐬𝐢𝐚𝐫 𝐜𝐚𝐳𝐢𝐧 𝐩𝐞 𝐭𝐮𝐡𝐢𝐧 𝐚 𝐧𝐮𝐩𝐢 𝐭𝐮𝐡 𝐭𝐡𝐚𝐰𝐧 𝐟𝐞𝐡 i: Zaiman tifangin Joseph tu David ai tesinfa imanin cia khua ah a fehhnak i. Mipum siar hmingkhum tuhin hoi tuh thawlthan ai a ham cia Mary thawn feh kawm i.

Bible thiam Saya Hre Kio in, Rome cozah in mipum siar tuh thu a suah fangin mah umhmun khua ten ah siar ruai (Pupa khua ah feh ruailo). Cen, Thukham Hlun ongah khai, “mipum siar fangin pupate khua ah feh in siar de tuh, tihnak Dan nganhnak umlo i, tiin Saya Hre Kio in nganhnak ah um i. [6] Lai ngantu Luke in Joseph le Mary tu Nazareth khuate tiin ngan i (2:39). Rome cozah te thu suah bang ilekhaw Joseph heh Nazareth khua ah mipum siarhnak hming pe tuhhnak i. Ikhalselai, Joseph heh Galilee ram Nazareth khua in Kumpibawi David tehnak Judea ram Bethlehem khua ah feh i (v. 4). Ciamanin, Joseph le Mary heh mipum siar tuhin Bethlehem khua ah a feh heh Profet Micah 5:2 ponghnak semkhim ruaihnak i, tiin ruat thil i.

B) Hotel ah zancamhmun colo heh thinniamhnak thawn Mosi Dan khim ruai

𝐯𝐯. 𝟔-𝟕 𝐉𝐨𝐬𝐞𝐩𝐡 𝐢𝐧 𝐡𝐨𝐢 𝐭𝐮𝐦𝐡𝐧𝐚𝐤 𝐌𝐚𝐫𝐲 𝐡𝐞𝐡 𝐁𝐞𝐭𝐡𝐥𝐞𝐡𝐞𝐦 𝐤𝐡𝐮𝐚 𝐚 𝐮𝐦 𝐭𝐞𝐧𝐠 𝐚𝐡 𝐟𝐚𝐩𝐚 𝐧𝐚𝐢 𝐢: Mary tu naupai ai, Bethlehem khua ah a um laitak ah nau nai can khim i. A fa upa ber ah fapa in nai ai pon in tuam hnuaah kawlpaw kuang songah hlim i; zaimantifangin riahbuk ah akhan co lo i.

– Zancamhmun khan pinlo manin innzua sumhnam rongaihnak kuang (Kawlpaw kuang) ah Jesuh tee, tihnak thu heh ruat fangin, a siartu caah ah thin nuamlo thai ngai i.

• Mi-zara (nau nai tuhlo minungte), in tang pial nuam tlanglo i nimaw?
• Cen, Hotel kherkher ilo, a hiangai umtute in tang, minung rori innzua sumhnam rongaihnak kuang songah tee heh sik ben tlang hmu ben tlang i ni maw?
• Ninghiohnak thinlung tang nai tlanglo i ni maw?

Joseph le Mary thin niamhnak thinlung naihnak heh phunhnih in rel thil i.

1) Joseph le Mary in khai Hotel ah zan camhmun nailo manin, khuasongah ninghio kun cuanglo ai, thinniamhnak thawn a remcang hmun, innzua sumhnam rongaihnak kuang songah nautee tuhin hmun lang menma i.

2) Cen, Mosi Dan (Hebru nunphung) khim ruai hnak i, tiin, ruat pha um i. Mosi Dan (Hebru nunphung) ah nau naite heh mithianghlimlo ah ruat i (Suangbawi Laibu 12:1-4). Cen, Mosi Dan (Hebru nunphung) ah, nupangte hlasiar dan a nai fangin mithianghlimlo ah ruat ai, a daingah, a tong ngahtute khai mithianghlimlo ah ruat i (Suangbawi laibu 15:25-26). Mosi pehnak dan hlunlo in Bawipa umhnak Ponhlam ningrim tiar ilekhaw, thihhnak tawk tlang tuh, tiin Mosi hnenah thu pehnak um i (Suangbawi laibu 15:31). Ciamanin, Joseph le Mary in zan camhmun tawklo manin midang hnenah ninghio kunlo heh amahte nunphung dan in mithianglo manin sawn i. Joseph le Mary heh mualpho le rinsuharsa tuar in, Mosi Dan (Hebru nunphung), khim ruai ai fapa Jesuh Khrih heh Bethlehem khua ah nai kom i.

A benhnak ah

Kin Bawipa Jesuh Khrih teehnak, Christmas heh laivum minungte (a hlaicein Khrihfate) caah ni-songlawi nikhat ai, kin Sanghnak hampuiber khai i. Zaizongza vumah thunaitu Pathian in a kutsuak minungte heh amah (Pathian) fa cang thil lehsal tuhin, a songlawihnak hmuahhmuah le a thunaihnak huham hmuahhmuah hlum in a tawntai mi nangmah le kaimah caah ah thinniamhnak thawn  laivum ah tee i. Zaizongza vumah thunaitu dinhmun hlum in laivum uktute thu heh thinniamhnak thawn hlun i. Pathian in a rilhnak a minungte (Hebru miphun) caah ah a pehnak, Mosi Dan (Hebru nunphung) heh rinsuharsa le mualphohnak tuar in khim ruai i. Mosi Dan ah, “Nupangte Fa nai fangin mithianghlimlo ai, a hnikpon le a tohnak tohkhamte khai thianghlimlo ah cang sio i. Ciami a tongtute khai mithianghlimlo ah cang tuh i”. Ciami Dan heh rinsuharsa le mualphohnak tuar in Inn nnailo le kilkhawltu nailo bangin innzua sumhnam rongaihnak kuang songah fapa (Jesuh Khrih) tee i.

Kin Bawipa Jesuh Khrih teehnak, Christmas heh thinniamhnak le thusang nun thawn teehnak i. Ciamanin, Khrihfa nun thihnak tu, thinniamhnak thawn thusang nun i, heh Khrihfa nun i.

Filipi 2:5-11 Jesuh heh thin niam hnak thinlung nai manin Pathian in khaisang i

A. Jesuh Khrih tu thin niam hnak thinlung nai i
5 Ning thinlung tu Khrih thinlung bang ituseh. 6 Khrih tu Pathian ihnak nai ṭio i; Ikhalselai Pathian bang tuhin khengkhebel in tum awng lo i. 7 Cia tahin, Amah ai lungtho niu in, amah ihnak hmuahhmuah zam ai, hnenum bangin um i. Minung ah cang ai mihing bangin suak ai mihing hmel in lar i. 8 Thinniamhnak thinlung nai ai Pathian thu hlun in, Thinglamteh ah thihhnak tianin tuar i.

B. Ciamanin, Jesuh Khrih heh Pathian in khaisang i
9 Ciamanin a sang ber hmunah Pathian in cawisang ai, Hming hmuahhmuah lakah Cungnungber hming pe i. 10 Ciatih imanin Jesuh hming upathnak pe in, Vancung ai a ummi hmuahhmuah in ituseh, Laivum le laihnia ai ummi hmuahhmuah inkhai ituseh, khuk caicin tlang tuhai,  11 Jesuh Khrih tu Bawi i, tiin Pa Pathian songlawihnak ah amahte veksen in phuang tuh i.

Khrihfa nun tihnak tu: Thinniamhnak thinlung nai in thu sang dunhnak nun i. Sangtu mite, laivum kin nunhnak ah Pathian kihzah in thinniam ngai nung ai konghoitu le hotute thu ngai in nung tute heh Pathian in dinhmun sang ah khaisang leh de i.

Thinniamhnak thinlung naiben tuhin Pathian in thazang thar ning pe tuten seh.

[1] Paul L. Maier (translator), Eusebius: The Church History, (Kregel Publications, 1999), 10.

[2] Paul L. Maier, The New Complete Works of Josephus, revised and expanded edition, William Whiston (translator), (Kregel Publications, 1999), 8.

[3] Stephen Hre Kio, Thukham Thar Simfiangnak: Luke 1-12: Hre Kio Commentary Series, Volume 3A, (Chin Baptist Union, 2019), 86.

[4] David E. Garland, “Luke: Exegetical Commentary on the New Testament, Vol. 3., Clinton E. Arnold (general editor), (Zondervan, 2011), 117.

[5] Steven Her Kio, Luke Thukham Thar Simfiangnak: Herkio Commentary Series, Vol. 3A., (Chin Baptist Union, 2019), 87.

[6] Ibid, 89.