Job Laibu Songai Pathian Thu: Midang Sanghnak bah ruai mah!

Laingaantu: Henry T Conzo
date: 06 September 2024

Job Laibu Thutlangpi

Job heh thil sual bawn awnglo mi-dikcang, rinsantlak Pathian biatu i (1:1, 8; 2:3). Pathian siang hnak manin (1:12, 2:6) Job heh satan in a naihnak hmuahhmuah siatsuah sio ai, a pum taksa tian ban siatsuah in cu (tempt) i (1-2). Ikhalselai, Job in Pathian heh rinsan tlak ngai in bia hlen i (1:22, 2:10). Job heh satan cu (tempt) hnak a tuar teng, sangkho ngai in a um teng ah (1:22, 2:10), a rualpite in tuarpi tuhin leng kawi ai (2;11), a tuarpi hnak lar ruai in, amahte hnikpon zik in laivut heh van ah hlip in a mahte lu ah khai phulh tlang i (2:12). Cetihin, Job khai heh phuncam thok ve cih i hang; a suahnia heh siamcam dekdo ai, laivum ai a nunhnak khai heh phuncam dekdo i (Job 3). Job ai phuncam hnak a rualpite in a za fangin Job heh sualhnak nai i si, tiin, mawh hluk tlang i (4 – 37). Job in a suallo i, mawh hnak zaikhai nailo ing, tiin, thiamthu rel dekdo ve i. Hnuataber ah Pathian in Job heh, “na fel ngaingai maw? Na fim ngaingai maw? tiin, Pathian in Job heh hau i (38 – 42). Job heh Pathian hmai ah a lung fim leh ai, Pathian in hmuifu a let in pe leh i. Pathian in Job ai rualpi pathumte khai heh, “zaimanin i cengfa Job in it hu heh a dikcang ngai in rel napui, ning in cen it hu heh a dikcang in rello i si” tiin, hau i (42:7). Cen, Pathian in Job rualpite heh, “Job hnenah ngaithiam ngen leh tu ih” tiin, ti i (Job 42:8–9).

Job laibu songin thupi ngai pakhat:

Job rualpite fimtar ngai in (Fim roh bangin ruat dun in), Job harsa hnak heh tuarpi i. Ikhalselai, Job hrangah thazang ngah hnak ah canglo in, suahnia heh siatcam in, nunhnak vumah phuncam hnak, suak ruai sawn i.

Job Laibu Songin zir pha thu:

Fimhnak le linghnak in minungte hngal ruai ai iithnak in kin hiang ai umtute tungding i (1 Korin 8:1). Ciamanin, thu kin linghnak le kin fimhnak te heh kin hiangai umtute ca ah siatral hnak le sawnhnak ah ilo in, tungding hnak le phathnem hnak suak tu sawn seh.